Fa’amatalaga e fa’atatau i le Fa’amasinoga Maualalo

O le Fa’amasinoga Maualalo le vaega muamua o fa’amasinoga i Queensland. E iai Fa’amasinoga Maualalo i nofoaga pe maua le 130 i le Setete. O le tele o mata’upu soligātulafono ma sivili e amata i le Fa’amasinoga lenei.   

O mata’upu e fofogaina i luma o se fa’amasino maualalo, o ofisa tofia e faia fa’ai’uga o mata’upu fa’apenei, mai le amataga po’o le fa’ai’uga, e fa’alagolago lava i le itu’aiga mata’upu. E leai ni fa’amasino lautele (juries) i Fa’amasinoga nei. 

A fa’apea e lē mana’omia ona e alu i le Fa’amasinoga ae tatau ona faila ni pepa i le ofisa resitara (registry), ona tatau lea ona e alu i le ofisa resitara e faila ai au pepa. O le ofisa resitara e lata i le faitoto’a ulufale o le fale fa’amasino.  

O le ofisa resitara fo’i le nofoaga e saini ai pepa (fa’ata’ita’iga, o pepa tatala i tua i aiaiga (bail)) ma tu’uina mai ai pepa o fa’atonuga mai le Fa’amasinoga. E iai aiaiga i itu’aiga pepa e mafai ona maua mai le ofisa resitara. A fa’apea e iai se mea te lē malamalama ai, fesili i se tagata faigaluega o le ofisa resitara e fesoasoani atu.